VossCup-opprigg4

Me er klare for Voss cup! Er du?

Er du snart klar for Voss cup 2023? Me er klare til å ta i mot over 700 lag til det som vert ei fantastisk fotballhelg i strålande og varmt vêr.

Mange hundre frivillige må til for å gjennomføra eit arrangement som Voss cup. Mange er i full gang med å førebu cupen. Onsdag tok telta til å reisa seg. desse skal husa både sponsorane våre, lager for varer, grill, diskotek og salsboder. 

Seks av dei som sveitta i varmen var Sergiy, Pavlo, Roman, Andrii, Denys og Dimi. Dei er alle flyktningar frå Ukraina, som vart rekrutterte som dugnadsgjeng av lærar Jon-Ivar Fjose på Vaksenopplæringa. 

– Dei har så lyst til å gje noko tilbake, og var veldig klare for å jobba på dugnad, seier Jon-Ivar. 

– Dei får snakka norsk, får treffa andre og dei får delta og vera med. Dette er integrering i praksis.

I løpet av dagen har dei, i lag med fleire andre dugnadsfolk, sett opp fleire telt og var ikkje tenkt å gje seg med det første med arbeidet. Mykje tid til snakk er det likevel ikkje i solsteiken, men det var berre smil og tommel opp frå heile gjengen då Voss Cup-avisa tok temperaturen på rigginga. Fleire kjem du kanskje til å treffa att andre stader under Voss cup også.

Voss cup skal vera kjekt for alle som deltek. Derfor er det lurt å pakka med seg alt ein treng for ei helg på Voss. 

Vêrmeldingane for Voss cup er fin lesing. Yr melder om sol og opp mot 30 grader. Hugs derfor å ta med ekstra solkrem og ekstra drikkeflaske.

Her ei liste over ting det er lurt å ha med:

  • Drakt og shorts
  • Leggbeskyttarar
  • Fotballsokkar
  • Badekle
  • Solkrem
  • Liggeunderlag (maks 90cm)
  • Sovepose
  • Anna skotøy
  • Anna kle
  • Toalettsaker
  • Jakke
  • Solbriller
  • Drikkeflaske

Gløymer du noko, så ikkje fortvil. Du får tak i det meste på Voss. Men hugs godt humør, fair play og fotballglede. 

Velkomen på cup, me gler oss til å sjå deg!